Tik… 11:30 Tak… 11:35 Tik… 11:40 Tak… 11:45. Pilit niyang
pinupunan ng sagot ang mga tanong habang hinahabol ang oras kahit hindi siya
sigurado kung tama ba o mali ang mga ito. Alam niyang huling eksamen na ng
klase ngayon at malinaw sa isip niya na dapat siya’y nag-aral. Napatingin siya
sa paligid. Tahimik ang buong kapaligiran. Walang gumagawa ng ingay sa loob ng
silid-aralan na para ba ang bawat segundo’t minuto ay ginto. Gusto niyang
ibalik ang oras hindi lang upang mag-aral, kundi siguruhing maipapasa niya ang
subject na iyon.
“69
ang Prelims at 71 naman ang Midterm grade mo”, sabi ng propesor niya habang
nakatingin sa class record.
“Ano’ng plano
mo ngayon?”, sabay tingin sa kanya.
“Hahabulin
po ang mga grades na ‘yan, sa Finals.”, sinabi n’ya iyon upang may maisagot
lamang at dahil wala rin sa kanyang isip ang bumagsak.
“May removal naman”, bulong nito sa sarili.
Oo, may ganitong kalakaran sa eskwelahan. Ang mga estudyanteng hindi pumasa sa
semestre ay pwede pang makahabol sa pagkuha ng removal. Hindi naman sapilitan
ang pagkuha nito at hindi rin sigurado kung papasa ang kukuha.
“Sige, ayusin mo ang grades mo. Pinapaalala ko lang
ang sinabi ko sa inyo dati na ‘wag umasa sa removal.”, ani ng propesor.
“Time’s
up! Pass your papers please.” Sa puntong ito, hindi lamang tiyan niya ang may
hinahanap, kundi maging ang kanyang utak. Wala ang konsentrasyon niya sa
pag-abot ng kanyang papel sa harapan. Umiingay na ang klase pero balewala ito
sa kanya. Iniisip na niya ang mga siguradong may tamang sagot. Pero base sa
kanyang pinag-aralan at kumpiyansa sa sarili, malayo ang dami ng inaasahang
maling sagot sa tama at inaakalang tamang sagot. Isa lang ang nasambit ng
kanyang bibig na siya lamang ang nakarinig, “Putek, bahala na sa removal”.
Malamig
ang simoy ng hangin sa umaga habang tinatahak niya ang daan papuntang faculty room.
Tahimik ang bawat taong kasabay niya pagpasok at lahat sila’y seryoso.
Nakakakaba. Kusa niyang ipinasok ang sarili sa loob ng faculty room at natanaw
agad ang taong ipinunta niya ng araw na iyon.
“Good
morning, Sir” sarkastikong bati niya dahil walang “good” sa kabang nararanasan.
“Grades?
Tama ba? Hanapin mo nalang ‘yung pangalan mo dito.”, ipinasilip sa kanya ang
monitor ng kompyuter.
Tumawa
siya ng malakas. Nagambala niya iba pang dalubguro na nasa loob ng silid, pero
wala na siyang pakialam sa mga iyon. Isa lang ang tumatakbo sa isip niya, -na hindi siya pumasa at hindi na rin kayang
habulin ng removal ang markang nakuha.